sunnudagur, janúar 12, 2003


Ég fór á Kubrik í gær í þeim eina tilgangi að sjá Barry Lyndon því sú mynd var sú eina sem mig langaði að horfa á í þessu maraþoni. Þegar ég mætti tíu mínútum eftir að myndin átti að vera byrjuð, stóð sýning á Clockwork Orange og meira að segja í miðri myndinni. Það kom seinna í ljós að maraþonið var 90 mínútum á eftir áætlun. Þetta eyðilagði fyrir mér planið! Ég glápti á CO til enda, hef margoft séð hana. Stórkostleg mynd, bara ekki á þessum tímapunkti. Eftir hana kom hlé sem varði ansi lengi og þá hóf upp raust sína í hljóðnema skringilegur maður kanadískur og byrjaði að þakka fólki fyrir að vera þarna, síðan sagði hann bíógestum að týna upp draslið en ekki með því að láta poka ganga á línuna heldur með því að setja nokkra áhorfendur í verkið, meðal annars lenti Andri vinur minn í þessu og hann tók sómasamlega til, með smá aðstoð frá áhorfendum. Gaurinn með hljóðneman flutti þá í kommúnu og allt var frábært hjá honum. Þegar þessu átaki lauk talaði hann í stundarfjórðung um löggusvínin sem reyndu að loka sýningunni og hvatti fólk til að stoppa þá ef þeir kæmu og ætluðu að slökkva á tækjunum. Ég hélt nú með laganna vörðum í þessari kjaftæði mannsins. Hann sagði ÞEIR hefðu hangið fyrir utan í allan dag að hindra fólk að koma inn, getur verið ég veit það ekki. Svo loksins þegar þessi þriggja tíma mynd átti loks að byrja rúmum tveim tímum á eftir áætlun byrjaði hann að rausa um eitthvað sem á frekar heima á heimasíðu. Loks byrjaði myndin, ég ætla ekki að gagnrýna hana hún hafði sýna kosti og galla, en allar tökur í myndinni gætu verið málverk, svo flott. En þá fraust draslið og eftir stutt 5 mínútna stopp var byrjað aftur en þá á röngum stað svo glöggir áhorfendur öskruðu réttan kafla til tæknimannanna. Það reddaðist og sýningin hélt áfram rétt en alla sýninguna varði hik í tölvubúnaðnum svo einstaka orð og sekúndubrot duttu út. Þegar myndin var að detta inn í hléi kom fullt af fólki til að horfa á Shining en þá var óvart mjög langt í þá mynd, leiðinlegt fyrir fólkið ég fann til með því. En ég kláraði myndina og fór síðan heim án þess að borga krónu, það vantar meira af svona afþreyingu.